Lewis Carroll epub Lès paskéyes d'Alice è payis dès mèrvèyes: Alice's Adventures in Wonderland in Central Walloon

  Lewis Carroll, di s’ vrê nom Charles Lutwidge Dodgson, a v’nu au monde à Daresbury (Cheshire) li 27 di janvier è 1832, èt il a moru l’ 14 dè minme mwès è 1898, à Guilford. Il èsteut mêsse di matématiques è Christ Church College à Oxford. I s’a intèrèssé ossi al fotografîye. Li 4 di julèt´ è 1862, i fêt one porminâde dins one bârque su l’ Tamise avou lès trwès fèyes dau dwèyin Henry Liddell dè Christ College, Édith (8 ans), Lorina (13 ans) èt Alice (tot jusse 10 ans ç’ djoû-là), èt co on soçon, li révérind Robinson Duckworth qui tint lès rames. Lès soûs lî d’mandèt dèlzî raconter one istwêre èt il èmantche li fauve d’one pitite Alice qui toume dins l’ tèréye d’on lapin. Alice li va soyî po qu’i mète tot ça d’ssu papî. Li scrîjeû va bin sûr ajouter totes sôtes d’afêres à s’ conte. I l’ofrit à Alice po s’ Noyé è 1864 èt l’anéye d’après, Alice’s Adventures in Wonderland èst publiyî avou dès dèssins da John Tenniel. Ci lîve-là a stî r’mètu dins one masse di langues. Li walon a tot ç’ qu’i faut ossi po raconter les paskéyes d’Alice. I-gn-a co dès djins qui tûzèt qui l’ walon, c’èst dè folklôre, qui c’è-st-on lingadje tot jusse bon po conter dès prautes. I n’ savèt nin qu’on scrît è walon dispeûy 1600 à pau près. I n’ savèt nin qu’au 20yinme siéke, dès grands scrîjeûs ont fêt d’ nosse litèrature one grande litèrature. Dji vou ossi bouter al tchèrète avou m’ traducsion d’on grand roman.